Луис Ван Гал нема да биде повеќе селектор на Холандија, натпреварот кој Холанѓаните го загубија од Аргентина на пенали беше негов последен на клупата на оваа репрезентација.

Холандија со два гола во финишот од натпреварот успеа да се врати од 0:2 против Аргентинците, но немаше среќа во пенал серијата каде што Аргентинците беа поуспешени.

„Нема да останам. Ова е мој последен натпревар. Не изгубив (во регуларен дел) ниту еден натпревар, не знам колку победивме, но може да проверите на ‘Гугл’“,  изјави Ван Гал по вчерашниот натпревар.

Во последниот мандат на Ван Гал на клупата Холандија забележа 14 победи и одигра шест нерешени натпревари со гол разлика 51:17.

„Имаме одличен тим со многу таленти и не бевме поразени со причина. Тешко ќе го преболиме овој пораз, имаше сомнителни судиски одлуки, но нема да дозволам да мислиме дека изгубивме поради судијата“, истакна холандскиот стратег.