Валенсија Баскет денеска ја информираше јавноста дека спогодбено се раскинати двете сезони кои преостанаа од договорот со Ненад Димитријевиќ, па шпанскиот кошаркарски клуб се раздели со македонскиот репрезентативец.

Нашиот плејмејкер потпиша за Валенсија Баскет во летото 2021 година од Хувентуд Бадалона и во сезоната 2021-22 одигра 33 натпревари со просек од 8,4 поени, 1,5 скок и 3,9 асистенции за 7,8 индекс за нешто повеќе од 18 минути по натпревар.

Во сезоната 2022-2023 играше на позајмица во руската екипа Уникс Казан со која имаше одлични игри и со тимот успеа да ја освои титулата во ВТБ лигата.

Во истото натпреварување Димитријевиќ беше прогласен за најкорисен играч (МВП).

Шпанците му се заблагодарија на Македонецот за покажаниот труд и професионализам додека го бранеше дресот на Валенсија Баскет и му посакуваат сè најдобро во иднината, како на професионален така и на личен план.