Вагиналните габични инфекции не се сексуално преносливи заболувања, но прашањето што ги мачи многу жени е – дали воопшто смеат да имаат сексуални односи додека инфекцијата трае? Одговорот на стручњаците е прилично јасен: иако не се работи за класична сексуално пренослива болест, сексот за време на габична инфекција може да донесе повеќе штета отколку корист, пишува „Живим“.

Вагиналната габична инфекција е многу чест проблем кај жени во репродуктивна возраст, позната и како кандидоза.

Болни односи

И мажите и жените можат да ја пренесат кандидозата за време на незаштитен сексуален однос. Поради самата инфекција, односот станува непријатен и болен, бидејќи контактот и триењето ги зголемуваат воспалението, го продолжуваат времето на инфекцијата и го отежнуваат лекувањето.

Кандидата понекогаш може да се пренесе и преку орален секс кај двата пола, што доведува до појава на орална кандидоза. Преносот може да се случи дури и кога нема видливи симптоми.

Најчест предизвикувач е габата Candida albicans, која природно живее во вагината, но под одредени услови почнува прекумерно да се размножува. Симптомите вклучуваат чешање, печење, црвенило и густ бел исцедок. Инфекцијата е поретка кај девојчиња пред првата менструација и кај жени по менопауза кои не користат хормонска терапија.

Апстиненција

Иако кандидозата не се смета за сексуално пренослива болест, таа сепак може да се пренесе на партнерот. Освен тоа, сексуалниот однос во тој период најчесто е болен, може да ги влоши симптомите, да го продолжи времето на опоравување и да внесе дополнителни бактерии во вагината. Тоа значи дека треба да се избегнува не само сексот со партнер, туку и користењето сексуални играчки или внесување прсти, бидејќи сето тоа може да ја влоши состојбата.

Кондомот може да го намали ризикот од пренесување и донекаде да ја заштити вагиналната флора, бидејќи го спречува контактот на спермата со вагиналната пХ-вредност. Сепак, тоа не е совршено решение – симптомите како печење и иритација може да се продолжат ако се има однос за време на инфекцијата. Затоа, дури и со заштита, стручњаците советуваат: почекајте со интимните односи додека инфекцијата целосно не се излекува.

Жените со дијабетес, особено ако не е добро регулиран, почесто страдаат од кандидоза. Зголемен ризик постои и кај оние со послаб имунитет – на пример, лица со ХИВ, или пациентки на кортикостероиди, хемотерапија или лекови по трансплантација.

Лекување

Најчесто лекувањето се спроведува со антимикотични креми, масти или таблети, а инфекцијата обично се повлекува за неколку дена. Стручњаците препорачуваат да се почека најмалку пет до седум дена по завршувањето на терапијата, односно додека симптомите целосно не исчезнат, пред да се продолжи со сексуални односи. Ако чешањето и печењето продолжат, неопходна е нова посета кај гинеколог.

Иако интимноста често нè привлекува дури и кога телото испраќа поинакви сигнали, при габична инфекција најпаметно е да се послуша стручниот совет – да се направи пауза и да му се даде време на телото да се опорави. Сексот нема да побегне, но непријатните симптоми може да потраат ако се игнорираат.