Девојче од Албанија се удавило на базен на грчкиот остров Паксос, откако под непознати околности отишло само во вилата оддалечена околу 500 метри од неговиот дом, јавија албанските медиуми. Родителите го пријавиле девојчето како исчезнато, но само по околу еден час тие ја дознале страшната вест.

Девојчето ќе биде погребано денеска, на денот на кој требало да го прослави својот четврти роденден.

„Родителите сè уште не разбираат како излегла од дворот и влегла во таа вила. Детето очигледно сакало да си игра…“, изјавил градоначалникот на Паксос, Спирос Влахопулос.

Полицијата ги однесе родителите и дедото на девојчето на сослушување, а тие подоцна беа ослободени.

Бабата вели дека е во целосен шок.

„Очајна сум, полицијата ги однесе мојот сопруг, ќерката и зетот во Обвинителството. Во шок сум, сама сум, сакам да умрам“, рекла несреќната баба.

Роднините на семејството велат дека малото девојче си играло во ходникот покрај влезната врата од куќата, кога одеднаш исчезнало. Според нив, тоа било само можеби една минута.

Родителите и дедото се обвинети за загрозување на безбедноста на малолетно лице, и иако биле ослободени по сослушувањето, им е забрането да ја напуштат земјата.