Две предвремено родени бебиња починале во рок од неколку часа во болница во италијанскиот град Болцано, јавуваат локалните медиуми. Едно од бебињата починало во вторникот, а другото во текот на ноќта меѓу вторникот и средата. Двете биле во инкубатори, на интензивна нега за новороденчиња во болницата во главниот град на областа Јужен Тирол.

Причината за смртните случаи, според првичните сомневања на лекарите, е инфекција, веројатно со бактеријата сератија, позната по заразување во болнички услови. Сератијата не е опасна за здравите луѓе, но може да биде сериозна кај пациентите со ослабен имунолошки систем, како што се предвремено родените бебиња кои сè уште немаат развиено одбрана против инфекциите.

Управата на болницата и раководителот на Одделот за неонатологија и неонатална интензивна нега, д-р Алекс Штефлер, размислуваат за воведување дополнителни мерки, а дел од другите бебиња кои биле згрижени на одделот се итно префрлени во други болници.

Според Здравствената служба на Јужен Тирол, ситуацијата сега е под контрола.

Болницата ќе спроведе внатрешна истрага за да утврди што се случило.