Петгодишно девојче исчезнало од детско игралиште во Берлин. По голема потрага, три часа подоцна, тоа било пронајдено во грмушките на локален парк. Тоа имало видлива убодна рана и итно било пренесено во болница, каде набрзо починало, пренесува „Берлинер цајтунг“.

Недолго потоа полицијата уапсила 19-годишен маж под сомнение дека го убил девојчето. На младиот човек му довериле родителите да чува четири деца, а според некои информации тие биле во роднинска врска, односно младиот човек е братучед на децата.

„Тој често се грижеше за четирите деца на возраст од една до пет години“, рече Себастијан Бухнер, портпарол на канцеларијата на државниот обвинител.

Во вторникот попладне тој бил со децата на игралиштето. Околу 14 часот и 30 минути најстарото девојче требало да оди во тоалет. Младиот човек го напуштил игралиштето со малото девојче и побарал од другите возрасни да се грижат за другите три деца.