Поранешниот пејач на „One Direction“, Лијам Пејн, починал на лице местото откако паднал од тераса на хотел во Аргентина, а сега е откриена точната причина за смртта.

Според патолозите, младиот Лијам починал од повеќе повреди, меѓу кои и фрактура на черепот, пишува „Дејли Мејл“.

Алберто Кресенти, шеф на службата за итни случаи во Буенос Аирес, откри дека Лијам имал „фрактура на черепот и екстремно тешки повреди што довеле до моментална смрт“.

Тој, исто така, изјавил дека веќе бил мртов кога службите за итна медицинска помош пристигнале во 17 часот по локално време, додавајќи:

„Нашата улога беше брзо да стигнеме таму, да пружиме медицинска помош и да се обидеме да го реанимираме, но неговите повреди беа фатални“.

Идентитетот на пејачот го потврдиле итните служби со проверка на неговиот пасош, а полицијата сѐ уште нема конечни докази за околностите на неговиот пад.

Да потсетиме, пејачот падна од станот на третиот кат со тераса со поглед на затворен базен и ресторан. Доцна синоќа, полицијата извршила темелно испитување на просторијата и терасата. За среќа во тој момент немало гости во ресторанот.