Самитот на Европскиот совет ќе се одржи во Брисел во денеска и утре, на 26 и 27 јуни, а лидерите, меѓу другото, ќе разговараат за реформите во земјите од Западен Балкан и напредокот во процесот на европска интеграција.

„Лидерите ќе разменат мислења за ситуацијата во Западен Балкан, особено за поддршката на ЕУ за реформските напори на партнерите и нивниот европски пат. Дискусијата ќе следи по посетата на претседателот на Советот, Антонио Коста, на регионот од 12 до 16 мај 2025 година“, се вели на веб-страницата на Советот.

Самитот ќе се фокусира и на Украина и на Блискиот Исток, а лидерите на ЕУ ќе разговараат и за членството на Украина во Унијата.

„Тие ќе разговараат за тоа како понатаму да се поддржат мировните напори, заедно со партнерите, вклучително и преку вршење поголем притисок врз Русија да прифати смислен прекин на огнот и да покаже вистинска подготвеност за преговори“, соопшти Советот.

Лидерите ќе разговараат за хуманитарната ситуација во Појасот Газа, како и за неодамнешната ескалација меѓу Израел и Иран.

Се очекува лидерите на ЕУ да разговараат за градење на одбранбени капацитети и зајакнување на одбранбената индустрија на ЕУ, како и за резултатите од самитот на НАТО во Хаг, каде што беше договорено членките на Алијансата да ги зголемат трошоците за одбрана на пет проценти од БДП.

На веб-страницата на Советот е наведено дека миграцијата и зајакнувањето на безбедноста на надворешните граници остануваат клучни приоритети за Европскиот совет, а лидерите ќе ги разгледаат и заклучоците на претседателката на Европската комисија, Урсула фон дер Лајен.

Лидерите ќе разговараат и за геоекономските предизвици со кои се соочува Европа и конкурентноста на ЕУ.

„Лидерите ќе разговараат за глобалните економски случувања и односите што ЕУ ги бара со клучните партнери, вклучително и претстојните меѓународни самити. Тие ќе разговараат и за можностите за зајакнување на меѓународната улога на еврото и продлабочување на единствениот пазар“, се наведува на веб-страницата на Советот.