Делегации од повеќе од 150 земји утре ќе присуствуваат во Ватикан на официјалната инаугурација на папата Лав XIV, објави денес Светата столица.

Претставниците на Италија, Перу и САД ќе имаат места во ВИП ложата, со оглед на тоа што Папата има перуанско и американско државјанство, јавуваат агенциите.

Американската делегација ќе ја предводи потпретседателот Џ.Д. Венс, а планирано е да присуствува и државниот секретар Марко Рубио.

Германскиот канцелар Фридрих Мерц, италијанската премиерка Џорџа Мелони, канадскиот премиер Марк Карни и украинскиот претседател Володимир Зеленски го потврдија своето присуство на мисата на плоштадот „Свети Петар“.

Евхаристиското славење ќе започне утре во 10 часот по средноевропско време во базиликата и на плоштадот „Свети Петар“, со што папата Лав XIV свечено ќе ја започне својата служба на чело на Римокатоличката црква.