Во женското финале во УС опен кое започнува од 22 часот ќе играат двете најдобри тенисерки на светот, првопласираната на ВТА ранг-листата Ига Швјонтек и Онс Жабер која е на второто место.

Швјонтек во полуфиналето беше подобра од Арина Сабаленка во три сета со 3:6, 6:1, 6:4, додека Жабер лесно ја совлада Французинката Каролин Гарсија со 6:1, 6:3.

Полската тенисерка вечерва ќе игра во своето трето гренд слем финале, претходно играше два пати на Ролан Гарос и ги осво титулите.

– Ќе биде исклучително тешко во финалето, од многу причини. Онс нема падови во играта, и сега е втора на ВТА ранг-листата. Таа не освои поени за пласманот во финалето на Вимблдон, но тој резултат е показател за нејзиниот огромен напредок. Таа има и незгоден стил, што ја разликува од повеќето тенисерки. Затоа нашите мечеви се тензични и неизвесни, а се сеќавам дека поминуваа во израмнета игра. Точно е дека не се чувствувам идеално на оваа подлога како што е случај со земјената, но карактеристика на големите шампиони е тоа што се прилагодуваат на секакви услови. Посакувам да бидам голема шампионка. Ниту во Индијан Велс не се чувствував идеално, но најдов начин да победам – вели Швјонтек.

Во меѓусебните дуели, резултатот е нерешен, и двете тенисерки имаат по две победи.
Онс Жабер е првата тенисерка од Африка што игра гренд слем финале и најави игра за победа.

– Тактички одиграв добро против Гарсија, бев психички подготвена. По Вимблдон бев под голем притисок и ми олесна што стигнав до финалето во Њујорк. Со пласманот во финалето на Вимблдон ги остварив соништата, бев под големи емоции, но сега е поинаку. Ќе бидам поподготвена и со многу поголем фокус на играта и тактиката. Можеби сега подобро разбирам што ми треба, знам дека ќе биде тешко и дека треба да го дадам максимумот за да победам – изјави Жабер.