Селекторот Благоја Милевски останува на кормилото на репрезентацијата барем до крајот на квалификациите за Европското првенство 2024 година, одлучи на денешната седница Управниот одбор на Фудбалската федерација на Македонија.

Договорот на Милевски истекува со завршувањето на циклусот квалификации односно до ноември оваа година, па и покрај најавите за промена тој ќе остане на клупата.

Управниот одбор на Фудбалската федерација на Македонија на денешната седница дискутираше во однос на работата и постигнатите резултати на македонската А репрезентација во квалификациите за ЕП 2024 под водство на селекторот, Благоја Милевски.

Управниот одбор на ФФМ го почитува начелото „на стара слава не се живее“. Незадоволство од постигнатите резултати е впечатокот кои го делат и членовите кои одлучуваат за избор на селектор на националниот тим.

Меѓутоа, имајќи ги в предвид околностите во групата во која се наоѓа македонската А репрезентација во квалификациите за ЕП 2024, распоредот на натпревари кои следува и релативно краткото време до завршување на договорот со актуелниот селектор, е на став Благоја Милевски да продолжи со работа во националниот А тим. Договорот на селекторот трае до ноември 2023 година“, објави ФФМ

Ова значи и дека дефинитивно Македонија ќе биде без услугите на капитенот Стефан Ристовски кој пред два дена објави повлекување од националниот дрес, а како една од причините го наведе лошиот однос со Милевски.

На селекторската позиција на Македонија, Милевски седна во 2021 година кога по настапот на Европското првенство си замина Игор Ангеловски.