Во големата сала на Филхармонија на 22 септември ќе се одржи концертот со наслов „Трансценденција за 4 пијана“ на кој ќе настапат пијанистките Дуња Иванова, Јанинка Невчева, Ива Дамјановски и Маријана Николовска.

Исклучително ретка можност да се слушне звук на четири пијана ќе биде концертот што следниот четврток ќе се одржи во големата сала на Филхармонија. Програмата, исто така, е специфична и ги вклучува делата „Четири органи“ од Стив Рајх, Квартето оп. 27 од Фулвио Калдини, „Стампеде“ од Кис Шоненбик и Концерт за четири чембала од Јохан Себастијан Бах.

Заедничката соработка на четирите пијанистки Дуња Иванова, Јанинка Невчева, Ива Дамјановски и Маријана Николовска потекнува од нивното учество во изведбата на делото од Стив Рајх за 18 музичари во 2021 година, кога настапија заедно со оркестарот на Филхармонија под диригентската палка на Паскал Галоа. Овој пат на сцената ќе бидат само со четирите пијана.

– Концертот „Трансценденција за 4 пијана“ претставува фузија на модерниот и класичниот звук. Преплетувањето на минимализмот со повторувачкиот манир кој создава амбиент на електроника и повторното враќање кон корените на музичката историја и барокот, а за публиката ќе овозможи уникатно музичко патување – објаснува пијанистката Дуња Иванова.

Стивен Мајкл Рајх е американски композитор познат по неговиот придонес во развојот на минималистичката музика од средината до крајот на 60-тите години на 20 век. Работата на Рајх е одбележана со употребата на повторливи фигури, бавен хармоничен ритам и канони.

Фулвио Калдини е италијански композитор, пијанист и музиколог. Од 80-тите години на минатиот век тој создаде голем број дела што главно се составени според минималистички принципи, покажувајќи особено влијание од музиката на Стив Рајх.

Кис Шоненбик е холандски композитор, кој во своите композиции користи звучни идиоми прифатливи за пошироката публика. Неговиот опус е широк и вклучува камерна музика, дела за хор, оркестар и дувачки инструменти. Неговиот звук е несомнено под влијание на англиските композитори Бенџамин Бритн и Ралф В. Вилијамс.

Јохан Себастијан Бах е истакнат германски музичар и композитор, кој важи за еден од најголемите композитори на сите времиња. Неговите дела се високо ценети поради нивната интелектуална длабочина, техничка заповед и уметничка убавина. Меѓу нив се издвојуваат Бранденбуршките концерти, Свитите и Партитите за пијано, Мисата во h-moll, Житието на Св. Матеј.

Проектот е дел од Годишната програма за култура за 2022 година на Министерството за култура на РСМ.

(Текстот е објавен во „Културен печат“ број 146, во печатеното издание на весникот „Слободен печат“ на 17-18 септември 2022)