Дијана Иваноска со својот талент за комбинација на вкусови нè носи на едно исклучително гастрономско патување. Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови. Своите рецепти почнала да ги споделува со своите следбеници и пријатели од почетокот на пандемијата.

„Го сакам секој дел од процесот, но најмногу уживам во фотографирањето на храната“, ни открива Дијана.

Инвентивната Дијана денеска споделува рецепт за едно гастрономско уживање – ѕвездесто лепче со песто.

„Не знам дали и вам ви се случува одреден период да се опседнете со некоја храна или зачин и да го јадете тоа нон-стоп? Мене периодов ми е песто на сè и со сè. Ако сте љубители на песто, лепчево ептен ќе ви се допадне. Ако не сакате песто, може да употребите друг намаз. Самото лепче е неутрално, може да го направите и со чоколаден крем или со путер од јатки“, порачува Дијана.

Потребни состојки:

– 7 г сув квасец (една кесичка)
– 1 лажица шеќер
– 230 мл млеко (млако)
– 480 г брашно
– 1 лажиче сол
– 3 јајца
– 100 г путер (омекнат)
– 250 г песто

Подготовка:

Во млакото млеко измешајте ги квасецот и шеќерот. Оставете да стои 10 минути. Додајте ги двете јајца и брашното измешано со солта. Замесете тесто. Додајте го омекнатиот путер и месете додека добиете меко и мазно тесто. Ставете го тестото во длабок сад премачкан со малку масло. Покријте со фолија и оставете го на топло да стаса еден час.

Загрејте ја рерната на 200 степени Целзиусови. Тестото поделете го на 4 еднакви делови. Расукајте го едното парче тесто во круг, околу 25 см пречник. Префрлете го на хартија за печење. Премачкајте го со песто. Повторете ја постапката со другите делови тесто и редете ги еден врз друг. Горната кора не ја мачкајте. Во средината на горната кора ставете чаша и со нож правете засеци до крајот на кората. Поделете ја кората на 16 дела. Фатете два соседни делови од тесто и завртете ги по двапати и составете ги краевите.

Изматете го преостанатото јајце и со мека четка премачкајте го лепчето.

Печете на 200 степени околу половина час, зависно од вашата рерна. Треба да добие убава румена боја. Кога ќе го извадите од рерна, покријте го со чиста кујнска крпа, па со најлон кеса и пак со уште една крпа. Завиткајте ги краевите убаво и нека стои така 10 минути. Послужете со уште песто или додатоци што вие ги сакате. Уживајте во секое залаче.