Изложба на скулптури од керамика со наслов „Временски сензации“ на Боро Новаковски – Новак ќе биде отворена на 18 април (четврток) во Уметничкиот центар „Арт хаб“ во Скопје, ГТЦ, 2 кат, локал 306, со почеток во 20 часот.

На изложбата ќе бидат презентирани ретките сочувани дела на Боро Новаковски – Новак, чијашто кариера како керамичар започнува во средината на 50-тите години. Неговите првични обиди за изработка на керамички скулптури биле скромни, обидувајќи се да додаде украси и бои на грнчарски производи. Сепак, набрзо го менува овој приод, фокусирајќи се на изучување на керамичарскиот занает и создавањето на сопствени уникатни скулптури.

Делата на Боро се одликуваат со нежни линии и хармонични облици, отсликувајќи го неговиот интимен и личен пристап кон керамиката. Тие се трајни сведоци за неговата страст и посветеност на керамичарската уметност.

Оваа изложба нуди уникатен поглед во неговиот свет, каде што секоја скулптура раскажува своја приказна, проткаена со историја, уметност и емотивна длабочина.

За сите љубители на уметноста изложбата ќе трае до 18 мај 2024 година, известија од Уметничкиот центар „Арт хаб“ во ГТЦ, Скопје.