Меѓународниот кривичен суд (МКС) денес соопшти дека Унгарија го прекршила меѓународното право со тоа што не го уапсила израелскиот премиер Бенјамин Нетанјаху за време на неговата посета на Будимпешта во април, и покрај меѓународната потерница издадена во ноември минатата година, пренесува Анадолу.

Во изјавата на Судот се наведува дека „неуспехот“ на Унгарија да ја исполни својата обврска го спречил МКС во извршувањето на својата надлежност.

Судот го информирал и Советот на држави-членки, надлежниот орган за следење на исполнувањето на обврските според Римскиот статут.

Иако е потписничка на Римскиот статут, Унгарија не го уапси Нетанјаху, кој престојуваше во четиридневна официјална посета. Унгарската влада во јуни објави намера за повлекување од Римскиот статут следната година.

Потерницата против Нетанјаху беше издадена поради сомнение за воени злосторства поврзани со конфликтот во Појасот Газа.