Минатите две години се одржа изложбата со тематски наслов „Просторни реадаптации 1.0 и 2.0“ на Скопската плажа како место за културна практика, каде што група автори со своите мултидисциплинарни и инвентивни истражувања го трансформираа отворениот простор на некогашната Скопска плажа, преполнувајќи го со разновидни концепти кои нудат свежи перспективи и давајќи му нова смисла.

Затоа, повторно оваа година на 21 септември, од 20 часот, ќе се оствари ново поп-ап продолжение со наслов „Просторни реадаптации 3: Скопската плажа како место за културна практика“ со учество на повеќе автори кои имаат за цел да ги претстават и иновативно да ги реадаптираат сопствените дела во склоп на Скопската плажа, од којашто е оставена само металната конструкција како додаток за изложбено поигрување.

На третото издание на изложбата ќе учествуваат авторите Ивана Ќ. Самандова, Ана Спасова, Доротеј Нешовски, Дарко Алексовски, Игор Таневски, Озбег Ајваз, Ана Трајковска, Филип Ивановски-Пепе и Дамјан Јанковски, автори кои ќе ја приближат уметноста до секојдневието на граѓаните и ќе овозможат поблиско запознавање на македонските уметници и различните изведби на денешната современа уметност.

Изложбата ќе биде поставена на кејот на Вардар на 21 септември и ќе трае од 20 до 23 часот, а проектот е поддржан од Министерството за културa и туризам, извести Ана Трајковска од ДЛУМ.