Универзитетот „Свети Кирил и Методиј“ – Скопје се соочува со проблеми во реализирање на студиските програми и научноистражувачка дејност, одржување на просторот, набавка на современа опрема итн.. Од таа причина, од УКИМ за „Слободен печат“ велат дека за да се одржи квалитетот на образованието, планираат да достават барање до Владата за зголемување на партиципациите од 200 на 400 евра и од 400 на 800 евра, со тоа што разликата во износите би паднала исклучиво на товар на Буџетот на државата, а не на студентите.

Иако согласно Законот за високо образование, тековните трошоци – комунални трошоци, одржување, опрема и потрошен материјал за реализација на студиските програми и за работењето на високообразовната установа на јавните високообразовни установи во целост се надоместуваат од државниот Буџет, наведените трошоци, освен комуналните трошоци, само делумно се покриваат. Заради неисполнување на обврската од член 123, став 5, УКИМ и неговите единици – факултети и научни институти се соочуваат со проблеми во реализирање на студиските програми и научноистражувачка дејност, одржување на просторот, набавка на современа опрема итн. – велат од УКИМ.

Со одлука на Влада во 2010/11 година школарините беа намалени и од тогаш до денес изнесуваат 200 евра во квота за редовни студенти кои се финансираат од Буџетот на Македонија и 400 евра во квота за редовни студенти со кофинансирање и за вонредни студенти, Од УКИМ додаваат дека од тогаш до денес цените на трошоците се многукратно покачени, особено во последните четири години заради пандемијата и глобалната економска криза.

Претходно, Министерството за образование и наука ги демантираше информациите што беа објавени во медиумите дека на иницијатива на Министерството и Владата ќе се зголеми двојно партиципацијата за студирање на државните високоообразовни установи на сите три циклуси на студии.

Се работи за невистинита информација и затоа апелираме студентите да бидат спокојни, бидејќи и натаму ќе ги плаќаат истите износи за државната и за квотата со кофинансирање кои важат во моментов. Во комуникација со Универзитетот „Св. Кирил и Методиј“ во Скопје, добивме информација дека ректоратот побарал мислење од факултетите и единиците во состав, за тоа дали износите кои во моментов се плаќаат се оправдани или можеби треба да претрпат одредени корекции. Но, тоа е интерно инициран процес, стои во демантот од Министерството за образование и наука.

Од МОН додаваат дека го почитуваат принципот на инклузивност при креирањето на политиките и носењето на одлуките.

Така што ги уверуваме студентите дека ниту една одлука која го засега нивниот образовен процес нема да биде донесена без да бидат вклучени организациите кои ги застапуваат идните академски граѓани – се вели во соопштението.

Некои од студенските движења во петокот информираа дека до нив стигнале информации дека двојно ќе се зголеми партиципацијата.