Европската куќа на фудбалот (УЕФА) потврди дека од оваа сезона нема да се одржува ждрепката која одредуваше кој тим ќе биде домаќин, а кој тим ќе гостува во реваншите од европските натпреварувања.

Наместо тоа, УЕФА воведува нов систем: тимот со подобар пласман во групната (лигашка) фаза ќе го има правото да го игра реваншот на домашен терен. Новото правило ќе важи во сите три главни натпреварувања, Лигата на шампионите, Лигата на Европа и Конференциската лига.

Ова значи дека примерите од минатите сезони повеќе нема да важат. Така, Реал Мадрид лани го играше реваншот против Арсенал на „Сантијаго Бернабеу“, иако имаше полош пласман во групната фаза – „кралевите“ беа 11-ти, а Арсенал заврши 3-ти. Со новите правила, реваншот би се одиграл во Лондон.

Особено интересна е и дополнителната промена, ако тим со понизок ранг успее да елиминира тим кој бил подобро пласиран, тогаш автоматски го презема неговиот статус на „носител“ за следната елиминациска рунда.

Со ваквите измени, УЕФА се надева на поголема транспарентност и фер услови за сите екипи во продолжението од сезоната.