Европската фудбалска унија (УЕФА) одлучи да го прекине натпреварот од петтото коло од групата Ц2 од Лигата на нации меѓу Романија и Косово, и го регистрира истиот со службен резултат 3:0 во корист на Романија.

Натпреварот меѓу Романија и т.н Косово се играше на 15 ноември во Букурешт, а беше прекинат на 90+5 минута при резултат 0:0. Фудбалерите на Косово го напуштија теренот бидејќи навивачите на Романија од трибините скандираа „Србија, Србија“ и „Косово е Србија“.

УЕФА преку соопштение објави дека ја казни Фудбалската федерација на Косово со 6.000 евра поради недолично однесување на фудбалерите на натпреварот против Романија.

УЕФА соопшти дека романската фудбалска федерација е казнета со вкупно 128.000 евра поради навивачки инциденти на натпревар во Букурешт. Исто така, Романија ќе одигра еден натпревар како домаќин без присуство на навивачи.

Романија го освои првото место во групата Ц2 со 18 бодови и се пласираше во дивизијата Б од Лигата на нации.