Упатства од Владата и Министерството за образование чекаат училиштата за да организираат онлајн настава за оние родители кои инсистираат на неа. За сите останати ученици, годината ќе почне со физичко присуство, со полн капацитет, според донесените здравствени протоколи.

Исклучоци од оваа одлука ќе има за деца со ретки болести или попречености, деца кои доаѓаат од семејства со хронично болни членови на семејството, по барање на родителите, или други немедицински причини, со дозвола на училиштето.

– До сега немаме ниедно поднесено барање од родител. Во контакт сме со некои родители што имаат хронично болни во семејствата и се консултираат околу тоа како да постапат. Има некои родители за кои навистина знаеме дека децата имаат здравствени проблеми, како операција на срце, и прашуваат што ќе биде со нив. Родителите што имаат хронично болни дома би требало да донесат писмена потврда од лекар. Во моментов, се уште чекаме упатства од Министерството за образование и од Владата, вели во изјава за „Слободен печат“ Драган Арсовски, директорот на гимназијата „Раде Јовчевски-Корчагин“.

Во основното училиште „Кузман Јосифовски-Питу“, пак, наставниците испратиле анкета до родителите во која бараат тие да се изјаснат за една од трите понудени опции за начинот на кој ученикот ќе ја следи наставата: со физичко присуство; онлајн заради здравствени причини; и онлајн заради други немедицински причини. На анкетниот лист е нагласено дека родителот ќе може да го смени исказот исклучиво по завршувањето на првото полугодие.

Андреја Стојанов, директорот на училиштето, ни кажа дека анкетата е интерна и дека нејзина цел е да се добие слика за тоа колкав процент од децата ќе следат настава со физичко присуство, а колку од дома, со цел училиштето да се организира.

– Ако требаше да организираме физичка настава и ако треба 600 деца да дојдат во училиште, организацијата е една. Ако се 300 на број, организацијата е друга. На пример, ако се повеќе, би имало две смени. Ако се помалку, организацијата е полесна. Целта беше да добиеме бројка за да знаеме како да се организираме. Бројките се уште ги немаме, во моментов знам дека има интерес за следење на наставата од дома, но не верувам дека е голем интересот. Според упатството од Министерството за образование, родителите треба да поднесат барање во кое ќе одберат една од трите опции. Во јули оваа опција за немедицински причини ја немаше, но во меѓувреме родителите се изборија за да ја има, изјави Стојанов за „Слободен печат“.

Во меѓувреме, родителите кои ја поддржуваат онлајн наставата на социјалните мрежи побараа Комисијата за заштита од заразни болести да се изјасни колкав треба да биде дневниот биланс на заразени и починати од ковид за да се оцени дека епидемиолшката состојба е „влошена“.

Министерката за образование Мила Царовска повторно нагласи дека ако влеземе во ризик, сценариото ќе се смени во она што ќе ни биде посочено како соодветно.

– За да се зачува континуитетот на образовниот процес, МОН е подготвено со уште две резервни сценарија за одвивање на наставата, кои би се применувале по процена на Комисијата за заштита од заразни болести, рече Царовска.