Еден од убиените во вечерашното пукање во старата скопска чаршија е Јетон Кривањева, кој ѝ е познат во јавноста од друга престрелка која се случи во хотелот „Александар палас“ во 2019 година, пишува „Фокус“. Во драматичен инцидент беа нападнати Кривањева и неколкумина негови пријатели.

Напаѓачите, кои исто како и оние кои го убија Кривањева вечерва, носеле фантомки, тогаш отвориле оган кон ресторант на хотелот, а тројца од петтемина вооружени луѓе влегле во хотелот извикувајќи „полиција“ и испукале рафали, пред да избегаат. Полицаец во цивил, кој случајно се нашол таму, им возвратил на напаѓачите со истрели од пиштол. За среќа, во инцидентот имаше само еден повреден.

Во друштво на Кривањева тогаш беше и Камер Идризи, кој беше убиен подоцна, во 2021 година во Бутел, кога во него пукаа напаѓачи од возило во движење, потсетува „Фокус“.

Во инцидентот вечерва, покрај Јетон Кривањева, загина и Енес Исени, а рането беше уште едно лице.

„Според првичните информации, неколку маскирани лица со огнено оружје пукале кон двајцата кои починале на лице место, додека повредениот е пренесен во болница за да му биде укажана лекарска помош. Фиксирани се траги на лице место, а јавниот обвинител ги издава сите потребни наредби и насоки со цел да се обезбедат докази кои ќе помогнат за расчистување на настанот и за откривање на идентитетот на сторителите“, соопштија обвинителството.