Младата фудбалска репрезентација на Македонија до 21 година денеска ги продолжува подготовките за претстојните предизвици што ја очекуваат во ноември.

На 16 ноември силите ќе ги одмериме со Грузија, на домашен терен, во рамките на четвртото коло од квалификациите за пласман на ЕП 2025 што ќе се одржи во Словачка.

Во пријателски меч, на 21 ноември нашите фудбалски надежи ќе играат против репрезентацијата на Австрија, во Риед.

Еден од најдобрите фудбалери на младата У21 селекција, Иван Николов даде своите видување за претстојните натпревари:

– Можам да ветам дека ќе одиграме максимално борбено и ангажирано на секој дел од теренот и во текот на сите 90 минути. Тоа е нашата одлика што нè красеше на првите два меча, голема пожртвуваност и надигрување. Ќе го дадеме нашиот максимум сè со цел да се вратиме на победничките патеки, по неочекуваниот пораз од Молдавија. Репрезентацијата на Грузија е доста незгоден противник, но доколку одиграме како што знаеме и умееме, верувам дека ќе славиме победа и ќе освоиме три бодови. Се подготвуваме за овој натпревар, ги слушаме советите од нашите тренери, знаеме кои се нивните слабости, знаеме што е потребно за да се издвојува победа која ни е неопходна во овој момент – вели Николов.

Во квалификациската група „Ц“ Холандија е првопласирана со 12 бодови од четири натпревари, следуваат Шведска и Грузија со по седум од четири натпревари, Молдавија има шест бодови од пет натпревари, Македонија има три бодови од три натпревари, а последен е Гибралтар без бодови од четири натпревари.