Американската тајна служба во понеделникот соопшти дека знаела за објавата на милијардерот Илон Маск на платформата за социјалните медиуми X, која беше поврзана со обидот за атентат на Трамп.  Сопственикот на платформата Х, поранешен „Твитер“, кој е поддржувач на Трамп, набрзо го избриша „твитот“ во кој пишуваше:

„И никој не се ни обидува да го убие Бајден/Камала“. Објава што ја заврши со емотикон на лице со кренати веѓите.

Тој брзо беше критикуван од корисниците на Х од левата и десната страна, кои рекоа дека се загрижени дека неговите зборови до речиси 200 милиони следбеници може да поттикнат насилство против Бајден и Харис, пренесува Ројтерс. 

Маск ја избриша објавата, но Тајната служба, задолжена да ги заштити сегашните и поранешните претседатели, потпретседателите и другите значајни функционери, забележа.

„Тајната служба е свесна за објавата на Илон Маск на социјалните мрежи и како пракса, ние не коментираме за прашања кои вклучуваат заштитно разузнавање“, изјави портпаролот на службата, за Ројтерс во електронска пошта.

„Можеме, сепак, да кажеме дека Тајната служба ги истражува сите закани поврзани со нашите штитеници“, се додава во одгворот.

Портпаролот одби да прецизира дали агенцијата контактирала со Маск, кој се чинеше дека во следните објави сугерираше дека се шегува.

„Па, една лекција што ја научив е дека само затоа што и кажувам нешто на група и тие се смеат не значи дека ќе биде толку смешно како објава на X“, напиша тој.

„Излегува дека шегите се помалку смешни ако луѓето не го знаат контекстот, а испораката е обичен текст“.

Кандидатката на демократите Харис, и актуелниот претседател Бајден изразија благодарност што Трамп не бил повреден и го осудија политичкото насилство.