Турската групација „Казанџи холдинг“ е заинтересирана да изгради когенеративни гасни централи во Македонија, кои покрај производство на електрична енергија, ќе произведуваат и топлинска енергија со која би се загревале домаќинствата во нашата земја – ова денес на прес конференција по средбата со претставници на „Казанџи“ го соопшти премиерот Христијан Мицкоски. Заедно со централите, се предвидува и изградба на секундарна гасоводна и топлинска мрежа, а домаќинствата нема да имаат никакви трошоци за приклучување, најави Мицкоски, наведувајќи дека Турците ќе вложат околу милијарда евра во проектите.

Засега, како што објасни премиерот, се разгледуваат две опции: инвестицијата во целост да ја спроведе турската компанија или државата да влезе во јавно-приватно партнерство. За ова ќе се одлучи наскоро, по разгледувањето на законските и уставните можности, рече Мицкоски.

„Станува збор за когенеративни централи со 500MW инсталиран капацитет кои произведуваат 4,1TWh електрична енергија и 720 GWh топлинска енергија на годишно ниво“, рече тој на прес-конференцијата.

Тој додаде дека кога станува збор за решавање на проблемот со загадување на воздухот и досега зборувал дека разговара со инвеститори кои се заинтересирани за градење на когенеративни гасни централи кои всушност се единственото трајно решение за загадениот воздух и дека се друго би значело ставање на проблемот под тепих.