Саки Тамогами (37) е позната како „најштедливата жена во Јапонија“. Таа тврди дека штедела 15 години на храна, облека и козметика – и успеала да купи три куќи.

Така на само 34 години го исполнила сонот кој го зацртала како деветнаесетгодишна девојка, пренесува „Одити централ“.

„Не купувајте ништо ако не е на распродажба“, е мотото на оваа Јапонка која работи како агент за недвижности.

Саки тврди дека прво престанала да купува нова облека, а носела работи кои ѝ ги дале пријателите или семејството. Потоа ги намалила трошоците за храна. Најмногу купувала евтини намирници, како тестенини, тост или ротквици.

По осум години од овој режим го купила својот прв дом, а до 2019 година веќе имала три имоти. Саки се појави во популарна ТВ програма, каде што ги шокираше Јапонците со својата екстремна штедливост. Таа детално проговори за својата страст и истакна дека „ретко го надминува дневниот буџет од едно евро за храна“.

Не се грижи многу за шминка и фризура. Ја скратила косата и ја продала за 20 евра. Така обезбедила половина од месечниот буџет за храна. Вели дека овој начин на живот е тежок, но се навикнала и нашла утеха кога го погледнала салдото на нејзината банкарска сметка.

На 27 години од платата заштедила доволно за да купи куќа, северно од Токио, за 62.000 евра. Веднаш ја изнајмила, а хипотеката ја плаќала со месечна кирија. Таа продолжила да штеди и за неколку години купила уште еден имот за 111.000 евра. За третата куќа издвоила 231.000 евра.

Саки наведува дека го исполнила својот сон, но продолжува да живее со исто темпо, како и да им помага на мачките. Таа веќе отворила и кафуле за напуштени животни во приземјето на една од нејзините куќи и планира да инвестира во други имоти.