Тројца Британци што биле ранети во бомбашки напади на ИРА пред три, па и пет децении, го тужат Џери Адамс, поранешниот член на Ирската републиканска армија, кој како лидер на партијата Шин Фејн придонесе за мировниот договор во Северна Ирска.

Надлежниот судија Мајкл Сули оцени дека Адамс може да биде тужен како „приватно лице“, но не и како член на ИРА, која е „нелегална организација“.

Адамс е веројатно највлијателната политичка фигура што придонесе за мир во Северна Ирска по повеќедецениските судири на републиканците со лојалистите и со британските власти. Тој беше лидер на партијата Шин Фејн од 1983 до 2018 година и никогаш јавно не признал дека бил член на ИРА, иако негови колеги тврдат дека бил еден од лидерите на терористичката група.

Џон Кларк, ранет при бомбашки напад на ИРА во Лондон во 1973 година, Џонатан Ганеш, ранет во 1996 година во лондонскиот кварт Доклендс и Бари Лејккок, ранет при бомбашки напад во Манчестер во 1996 година, тврдат дека Адамс бил „водечки член на ИРА“ во периодот кога биле извршени нападите и е „директно одговорен“ за поставувањето на бомбите. Тие бараат симболична отштета од по 1 фунта.