Три лица поврзани со вчерашното убиство на албанскиот судија Астрит Калаја се уапсени денеска. Според извештаите, во инцидентот биле повредени уште три лица, мотивот засега е непознат, а осомничениот Елвис Шкамби по пукањето сам се предал и бил приведен.

„Покрај Елвис Шкемби, кој пукаше во судницата и неговиот чичко Ѓон Шкамби, како соучесник, уапсен е и Бануш Коџај, вработен во обезбедувањето во судот кој не само што не ги контролирал туку не ги евидентирал во соодветната книга, каде што мора да бидат евидентирани сите лица што влегуваат и излегуваат од просториите на судот“, се наведува во соопштението од албанската полиција.

Синоќа албанските медиуми објавија дека на судијата Астрит Калаја во срце му пукал 30-годишниот Шкамби. Тие објавија и фотографија од убиецот.

По настанот што ја шокираше јавноста и отвори сериозни прашања за безбедноста во судовите, албанскиот парламент денеска оддаде едноминутен молк, а дебатата се насочи кон подобрување на заштитата на судиите.

Делегацијата на ЕУ побара албанските власти итно да ја засилат безбедноста на судскиот систем. Премиерот Еди Рама повика на „најекстремен правен одговор“, додека професионалните здруженија предупредија дека нападот претставува тежок удар врз независноста на судството.

Албанските медиуми пренесуваат дека Шкамби имал активни судски процеси поврзани со сопственост на објект во кој живеат 31 семејство, кои тврделе дека документите биле фалсификувани. Властите допрва ќе утврдуваат како осомничениот внел оружје во судницата—детал што го отвора прашањето за пропусти во обезбедувањето и протоколите при пристап во судовите.

Случајот повторно ја актуелизира потребата од јасни стандарди за физичка безбедност на судовите: скрининг на влез, контрола на оружје и ризик-процена за предмети со потенцијал за ескалација. Истрагата продолжува, а институциите најавуваат внатрешни проверки за да се утврди дали и каде системот потфрлил.

ЕУ бара од Албанија под итно да ја зголеми безбедноста на судиите