Лига на нации е можеби „полесната“ прва опција за националната репрезентација да се дојде до ЕУРО, но имаме и уште една, а тоа се редовните квалификации во кои исто така имаме многу добар старт.

Следните два меча во јуни што ќе ги играме на Националната арена „Тоше Проески“ во Скопје против Полјаците (7 јуни) и Австријците (10 јуни), ќе бидат можеби и клучни дали навистина нашите сениори имаат сериозна намера да се вмешаат во битката за една од првите две позиции во групата кои водат директно на ЕП.

Како што дознаваме, селекторот Игор Ангеловски составот за дуелите со Полска и Австрија би требало да го објави на 23 мај после финалето од Купот, кој пак е закажан еден ден порано, а таму силите ќе ги одмерат Македонија ЃП и Академија Пандев.

Стратегот на „црвено-жолтите“ се очекува да даде објаснување за повиканите и евентуални повредени фудбалери. Се очекува да нема некои драматични проблеми, единствено е познато дека поради повреда ќе отсуствуваат Иван Тричковски, но и Стефан Спировски, кој имаше операција на коленото.

Фудбалерот на АЕК Ларнака, Тричковски, ја круниса одличната сезона со признание во изборот на Кипарската фудбалска федерација.

Се очекува повратници да бидат Аријан Адеми, Ферхан Хасани, Дарко Велковски и Марјан Радески, потоа Езџан Алиоски полека заздравува од повредата, а за Илија Несторовски најверојатно ќе се знае до последен момент дали ќе биде 100% подготвен за новите репрезентативни предизвици.

Како никогаш досега владее една неверојатна позитивна атмосфера во македонската фудбалска и спортска јавност, која верува дека 2020 година ќе биде историска за националната А репрезентација.