Доколку Леброн Џејмс следното лето стане слободен играч, веќе е познато кои тимови би сакале да го доведат како последна „станица“ во неговата славна кариера. Во јавноста се појавуваат бројни шпекулации за неговиот следен потег – од можноста да побара размена, па сè до целосно повлекување од кошарката.

Леброн има договор со ЛА Лејкерс до крајот на наредната сезона. Ако одлучи да продолжи да игра и по неа, меѓу најзаинтересираните клубови за неговиот потпис, според „Dallas Hoops“, се Голден Стејт Вориорс, Кливленд Кавалирс и Далас Маверикс.

Се смета дека неговиот следен клуб би бил воедно и последното поглавје во неговата НБА кариера, особено бидејќи сè почесто се поставува прашањето колку време му останува во лигата.

И покрај тоа што има 40 години, минатата сезона Леброн одигра 70 натпревари за Лејкерс, со просек од 24,4 поени, 7,8 скокови и 8,2 асистенции по меч – уште еднаш покажувајќи дека и понатаму има многу да понуди на теренот.