Романите „Простување“ од Кица Колбе („Или-или“), „Светот што го избрав“ од Калина Малеска („Или-или“) и „И ѕирка и проѕирка“ („Антолог“) се трите книжевни дела што влегоа во најтесниот избор за годинашната награда „Роман на годината“, што ја доделува Фондацијата за унапредување и промоција на културните вредности „Славко Јаневски“.

Одлуката за наградата ќе ја донесе комисијата во состав: Лидија Димковска (минатогодишна лауреатка и претседателка на жирито), Маја Бојаџиевска, Ѓоко Здравески, Андреј Ал-Асади и Катерина Богоева (претставничка на Фондацијата).

Насловот на победничкиот роман ќе биде соопштен на прес-конференција на 14 март (петок), што ќе се одржи во кафе-книжарницата „Буква“ во Скопје, со почеток во 12 часот.

На конкурсот за наградата „Роман на годината“ годинава се пријавија 43 романи, а комисијата преку неколку селекции стаса до најтесниот избор. Како една од спецификите на годинашниот конкурс е фактот дека во најтесниот избор влегоа романи напишани од авторки, што е своевиден куриозитет во историјата на наградата.

Наградата „Роман на годината“ за 2024 година, чиј генерален покровител е „Комерцијална банка“ АД Скопје, а поддржана е и од Министерството за култура и туризам на Република Северна Македонија, се состои од плакета, статуетка и паричен износ од 150.000 денари што го добива авторот, во случајот авторката, на победничкиот роман.

Наградата „Роман на годината“ се доделува по 26-ти пат, а свеченото врачување ќе се одржи кон средината на мај оваа година.