Театарот за деца и младинци (ТДМ) од Скопје на 57. Интернационален фестивал за куклен театар (ПИФ) во Загреб, што се одржа од 13 до 19 септември оваа година, освои три награди за изведбата на претставата „Роња, ќерката на ограбувачот“.

Официјалното жири на ПИФ – Загреб, Хрватска, одлучи награди да додели на актерката Матеа Јанковска за актерско остварување во насловната улога Роња, на комплетната актерска екипа за колективната анимација на кукли и за сценографијата за Олга Зјебинска.

Претставата досега има освоено награди на фестивали во Подгорица, Котор, Нови Сад, Крагујевац, како и на 57. МТФ „Војдан Чернодрински“ во Прилеп, каде наградата за млада актерка ја доби Матеа Јанковска за улогата на Роња.

Претставата е поставена според романот од Астрид Линдгрен, а во режија и драматизација на Јакуб Максимов од Чешка.

Во реализацијата на претставата учествува мешана театарска екипа со автори од Чешка, Полска, Србија и Македонија. Драматург и автор на преводот на текстот е Горјан Милошевски. Сценографијата, костимографијата, дизајнот на кукли и маски, како и на плакатот и брошурата е на Олга Зјебинска од Полска, а композитор и корепетитор е Лазар Новков од Србија.

Актерите Матеа Јанковска, Никола Наковски, Мики Анчевски, Катарина Илиевска Силјановска, Ангела Димитрова и Петар Стојанов играат и изведуваат сонгови на сцената. Премиерата на претставата се одржа на 26 декември 2022 година во Театарот за деца и младинци во Скопје.