Исходот од локалните избори во албанскиот политички блок директно ќе се одрази на „Илинденска“, односно дали премиерот Христијан Мицкоски ќе остане само на веќе најавената реконструкција на Владата или ќе се соочи со притисок за евентуални предвремени парламентарни избори, опција која тој засега ја отфрла. Дека голем е влогот на локалните избори потврда е и жестоката кампања помеѓу Вреди и ДУИ особено за Чаир, кој првпат на овие избори се издигна на ниво на Тетово како бастион на Албанците и единица мерка кој е победник, а кој губитник на изборите.
Иако Мицкоски речиси при секој јавен настап уверува дека владината коалиција ќе биде убедлив победник на локалните избори, сепак извори од партијата брифираат дека се разгледуваат три сценарија во зависност од изборниот резултат на Вреди.

На ВМРО-ДПМНЕ најмногу ѝ одговара статус кво

Висок функционер на ВМРО-ДПМНЕ брифира дека ним најмногу им одговара статус кво, односно и по локалните избори Владата да продолжи да го турка четиригодишниот мандат. Најбитно прашање е каков ќе биде резултатот на локалните избори каде во директна изборна трка влегуваат лидерите на владиниот партнер Вреди, односно Билал Касами, кој атакува на втор мандат во Тетово, и Изет Меџити, кој од вицепремиерската функција ѝ се враќа на градоначалничката кандидатура за нов мандат во Чаир. Касами ќе треба да го победи кандидатот на ДУИ, партискиот потпретседател Бајрам Реџепи, додека Меџити ќе му се спротивстави на потпретседателот на ДУИ Бујар Османи. Ако Вреди изгуби во Тетово и во Чаир, функционерот што не брифираше вели дека тоа не само што ќе содаде проблем на коалицијата Вреди, туку и на ВМРО-ДПМНЕ зашто ќе биде загуба на двајца лидери од владина коалиција.
„Слободен печат“ според брифинг од Вреди, веќе објави дека во таков случај тие сами ќе излезат од Влада и нема да чекаат Мицкоски да им ја покаже вратата од „Илинденска“.
Второто сценарио кое се разгледува е Вреди да не оствари силна победа, но да ги добие Тетово, Чаир и, на пример, една помала општина како Студеничани, и тоа да се пласира како солиден резултат којшто не би предизвикал потрес во Владата.
Најкатастрофално за владината коалиција би било Националната алијанса за интеграција, предводена од ДУИ, да оствари голема разлика во однос на Вреди. Според функционерот, тоа би значело дека ќе се засили притисокот врз Мицкоски за предвремени парламентарни избори, карта на која игра опозициската ДУИ.
На последните парламентарни избори (репер се тие зашто Вреди не постоеше на последните локални избори), Вреди во Чаир оствари блага предност пред Европскиот фронт, односно 5.000 гласа наспроти 4.900. Калкулациите на ВМРО-ДПМНЕ се дека на претстојните локални избори резултатот ќе биде во корист на Меџити ако кон гласовите на Вреди се додадат и 1.900 гласа колку што имаше ВМРО-ДПМНЕ на парламентарните.

Но, една е математиката во канцеларија, а друга е таа на терен, односно сè од тоа ќе зависи колку Меџити ќе успее чаирчани да ги убеди дека со евентуално третиот мандат како градоначалник ќе биде поуспешен на чело на општината од поранешниот сопартиец Османи.
Дека се оди на сè или ништо јасно е и од секојдневните обвинувања, шпекулации и пробни балони меѓу ВМРО-ДПМНЕ и Вреди од една, и ДУИ од друга страна.
Премиерот повеќепати повтори дека опозицијата ќе загуби на локалните избори во сите општини и порача дека очекува од ДУИ да биде конструктивна опозиција во однос на гласањето на законите за кои е потребно Бадентеровото мнозинство, особено кога станува збор за измените на Изборниот законик.

Според Османи, ДУИ добива „топли“ пораки од ВМРО-ДПМНЕ

Османи возврати дека Мицкоски јавно кажува едни пораки, додека преку приватни канали од ВМРО-ДПМНЕ до ДУИ стигнуваат други – за затоплување на односите меѓу двете партии, правејќи место за влез на интегративците во Владата. Османи со тоа потврди дека има комуникација меѓу ВМРО-ДПМНЕ и ДУИ.  На дополнително прашање дали под затоплување на односите се мисли на идно коалицирање и влегување на ДУИ во Владата, Османи кратко одговори: „Да“.

– Премиерот во јавноста дава пораки сметајќи дека така ќе им помогне на коалициските партнери, но не пушта такви пораки преку приватните канали. Други пораки се праќаат до ДУИ за да се затоплат односите. Меѓутоа, нашиот став ние го кажавме – ДУИ нема да прави пазар за влегување во Влада, излези еден, влези друг – рече Османи и додаде дека Албанците ќе гласаат на избори и ќе одлучат самите кој ќе ги претставува.

Ни Мицкоски, ни ВМРО-ДПМНЕ досега не го демантираа Османи. Од партијата експресно одговорија дека на Османи или не му кажале, или не сака да се сети на времето кога преговарачкиот тим на ДУИ остави бел лист хартија пред ВМРО-ДПМНЕ, подготвени да го исполнат секое барање само за да останат во Владата.

-Тогаш така храбро не звучеа и не се однесуваа првенците на ДУИ кои сега силно се удираат во гради – соопшти ВМРО-ДПМНЕ.

За Османи, смешни спинови се обвинувањата дека побарал помош од Унгарија за подобрување на односите со ВМРО-ДПМНЕ.

Мицкоски неодамна најави дека по локалните избори ќе има реконструкција на Владата. Тој најави освежување на министри од ВМРО-ДПМНЕ, а се очекува и нови министри од Вреди ако Меџити и министерот за социјална политика Фатмир Лимани станат градоначалници. Сепак дали Владата ќе истурка цел четиригодишен мандат или ќе има предвремени парламентарни избори ќе зависи од резултатите на локалните избори и дали Мицкоски ќе успее да ја менаџира Владата ако Вреди ги изгуби изборите.