Единствениот фестивал на јапонска култура во земјава „Сакура фестивал“ го најави своето трето издание, кое ќе се одржи на 1 јуни во Младинскиот културен центар во Скопје.

Организацијата „Јапан@мк“, која се занимава со промовирање на јапонската култура во земјава, во нивните објави најавуваат тема што ќе се занимава со природата и одржливоста, односно како да научиме од далечната источна култура да ја почитуваме и да живееме во склад со природата градејќи си подобра иднина.

Слоганот на фестивалот за оваа година е „Расцути ја иднината“, фрлајќи светло на нашата лична одговорност и ангажираност за тоа каква иднина ќе доживееме како заедница.

Од „Јапан@мк“ најавуваат богата програма, опфаќајќи уметнички изложби, настапи и перформанси, панел дискусии, мода, презентации, боречки вештини, гејминг, концерти и многу забава. Секако, ќе може да се проба и јапонска храна и да се набават сувенири.

Меѓу настаните со кои се најавува фестивалот, на 18 мај во КСП „Центар-Јадро“, со почеток од 13 часот, ќе се одржи работилница за создавање уникатни ликови со манга стил.

Работилницата ќе ја води Тања Вукобрат, дипломиран графички дизајнер на Факултетот за арт и дизајн на Европскиот универзитет во Скопје. Таа работи како фриленс-илустраторка веќе десет години, а најчесто изработува детски илустрации и корици на книги. Има остварено соработка со издавачките куќи „Просветно дело“, „Чудна шума“, „Или-или“, „Македоника литера“ и „Арс ламина“.

(Текстот е објавен во „Културен печат“ број 231, во печатеното издание на весникот „Слободен печат“ на 18-19.5.2024)