Тренчовски не е повеќе тренер на Академија Пандев
Како што официјално информираат од клубот, според договорот од денеска Југослав Тренчовски не е повеќе тренер на сениорскиот тим на Академија Пандев.
Препорачано
– Ја поддржуваме желбата за нови лични предизвици и нови почетоци во кариерата. Шефе ти благодариме! – известуваат од ФК Академија Пандев.
Во наредните денови ќе биде соопштен и новиот шеф на стручниот штаб кој ќе ги предводи „пандевци“ во понатамошниот дел од сезоната.
– 90 дена исполнети со дружење, радости, тагувања. Денови во кои се обидовме да ја вратиме психолошката стабилност. Остваривме неколку подеми, победи. Горд сум на вашиот пласман во полуфиналето од националниот куп. Но исто така имавме и многу падови, премногу изгубени бодови на домашен терен, бевме сведоци на многу судиски одлуки кои беа на штета на сите нас. Во едно сум убеден, а тоа е дека од сите овие моменти научивме многу бидејќи го чекоревме најтешкиот пат. Лузните кои ги добивме во овој период во иднина само ќе сведочат за нашата желба, постојаност, верба..
Следува период на одмор, носете мудри одлуки, со ладни глави. Засекогаш ќе останете во мојата позитивна страна, од една моја приказна во која ќе ги помнам само прекрасните моменти. Во иднина ќе бидам ваш најверен подржувач, затоа што убеден сум дека ќе успеете во зацртаната цел, затоа што вие сте моите херои !!! Според претходниот договор нашето заедничко патување денес заврши. Време е за некои лични и нови предизвици, нови почетоци …. Ве сакам од срце – напиша Тренчовски на својот фејсбук профил.
Во есенскиот дел од сезоната на Првата лига Академија Пандев во 18 натпревари освои 17 бодови и моментно е на претпоследното 11 место.
