Американскиот претседател Доналд Трамп во неодамнешно интервју ја истакна, како што рече, „неверојатната способност за технологија“ на неговиот син Барон. Како пример за тоа, Трамп откри дека неговиот син знае сам да го вклучи својот компјутер.

Во разговорот со водителката Лора Инграхам, тој беше запрашан дали Барон еден ден би можел да се посвети на бизнисот или политиката, како неговиот татко. На тоа, Трамп одговори дека постои и трета можност – технологијата. „Можеби токму тоа ќе биде неговата насока“, изјави поранешниот претседател, а потоа објасни зошто така мисли.

„Само ќе го погледне компјутерот… Јас ќе му го исклучам и ќе му кажам ‘Добро, одлично’, а кога ќе се вратам по неколку минути, тој веќе го вклучил повторно. Го прашувам ‘Како го направи тоа?’, а тој има неверојатен талент за технологијата“, рече Трамп, видно сериозен.

По оваа изјава, веднаш следуваа потсмешливи реакции на социјалните мрежи.

„Вонредна вест: поранешниот претседател е изненаден што неговиот син знае да вклучи компјутер“, гласеа дел од саркастичните коментари.

Но, не остана сè на шегите. Во истото интервју, Трамп потсети и на улогата на Барон во неговата изборна кампања во 2024 година. Тој нагласи дека токму неговиот син му помогнал да допре до помладите гласачи, советувајќи го да се појави во емисии на познати водители кои имаат влијание врз младата популација.
„Тој знае што ги интересира младите луѓе“, изјави Трамп.