Поранешниот американски претседател Доналд Трамп се спореди со Алексеј Навални, тврдејќи дека е жртва на политички прогон исто како и рускиот опозициски лидер, кој пред неколку дена почина во озлогласен затвор во поларниот круг.

Во интервју за телевизијата „Фокс њуз“, Трамп изрази жалење за смртта на Навални. Актуелниот претседател Џо Бајден и западните лидери ја префрлаат на рускиот лидер Владимир Путин одговорноста за смртта на опозиционерот.

– Навални беше во многу тажна ситуација и тој беше многу храбар, тој беше многу храбар тип. Тој се врати, а можеше да остане надвор, и, искрено, веројатно ќе му беше многу подобро да остане подалеку и да говори надвор од земјата, наместо да се врати назад, бидејќи луѓето помислуваа дека може да се случи тоа што се случи – изјави Трамп, алудирајќи на одлуката на Навални да се врати во татковината по лекувањето од труење во Германија, иако сите знаеја дека ќе биде приведен штом стапне на територијата на Русија.

Трамп притоа забележа дека се чувствува како да е во иста ситуација како Навални во Русија.

– Тоа е ужасно, но се случува и во нашата земја, која се претвора во комунистичка земја на многу начини – додал Трамп, говорејќи за низата судски процеси против него за разни обвинувања, од поттикнување на бунтот во Капитол хил, па сѐ до даночни затајувања.

Пред неполна недела со судска пресуда на Трамп му беше наредено да плати казна од 355 милиони долари, плус камата од 99 милиони долари, поради лажно претставување на вредноста на својата компанија со цел да добие поповолен кредит.

Државната обвинителка на Њујорк Летиша Џејмс објави дека е спремна да отвори процес за конфискација на имотот на Трамп, бидејќи се верува дека тој нема доволно активни средства за да ја плати казната.

Во изборна година, кога Трамп речиси сигурно ќе биде претседателски кандидат на републиканците, тој се соочува со уште низа судски процеси, за кои вели дека се политички мотивирани, а тој лично е жртва на „лов на вештерки“.

– Ме обвинија четири пати, само поради фактот дека сум во политиката. Ме обвинија за работи што се толку смешни. Тоа е форма на Навални. Тоа е форма на комунизам, на фашизам – изјави поранешниот претседател за „Фокс њуз“.

Тој, сепак, избегнал да одговори на прашањето дали може да стане „потенцијален политички затвореник до својата смрт, како и Навални“.

– Ако губиме на акнетите, тогаш тие нема да зборуваат за мене и не би имал какви било проблеми со законот. Ако бев надвор, мислам иако ме мразат толку многу, мислам дека ако бев надвор, тие сѐ уште би биле „ајде да го гониме овој тип, не можеме да го поднесеме овој тип“ – изјави поранешниот претседател.

Трамп во интервјуто воопшто не го спомнал по име рускиот претседател, кого повеќе го фалел отколку што го критикувал и кога беше претседател на САД.

Путин, пак, неодамна му возврати со „комплимент“ кога изјави дека „повеќе би сакал за претседател на Америка да биде избран предвидливиот Бајден, отколку непредвидливиот Трамп“.

Анализи на американската разузнавачка заедница, од друга страна, укажуваат дека Москва преку хакерски групи и други инструменти спроведувала операции во спротивна насока – за оцрнување на противкандидатите на Трамп и на изборите во 2016 година, на кои тој победи, и во 2020 година, на кои изгуби.