Американскиот претседател Доналд Трамп направи грешка за време на посетата на Велика Британија кога се пофали дека го решил спорот во регионот Нагорно-Карабах меѓу Азербејџан и, како што рече, Албанија, осврнувајќи се на Ерменија, објавија  американските медиуми.

Како што објавија неколку странски весници, ова е трет пат за само неколку недели Трамп да ги измеша Ерменија и Албанија.

На прес-конференцијата со британскиот премиер Кир Стармер, Трамп се пожали на ставот на рускиот претседател Владимир Путин за војната во Украина.

„Многу сум разочаран што овој конфликт не е решен“, рече американскиот претседател, објави Ле Фигаро.

За да даде пример за неговата способност да решава вакви ситуации, тој го спомена конфликтот во Нагорно-Карабах.

„Кога ќе помислите, на пример, дека го решивме конфликтот меѓу Азербејџан и Албанија, кој траеше со години“, рече Трамп, не сфаќајќи дека направил грешка.

Потоа ги откри тајните детали од неговата средба со претседателите на Ерменија и Азербејџан, која, според него, помогнала во завршувањето на конфликтот.

„Тие седеа на спротивните страни од Овалната соба, оддалечени еден од друг. Откако поминавме еден час заедно, тие почнаа да се зближуваат сè повеќе и повеќе, а на крајот сите се прегрнавме“, рече Трамп.

На 8 август, американскиот претседател потпиша меморандум за разбирање од седум точки со ерменскиот премиер Никол Пашинјан и азербејџанскиот претседател Илхам Алиев, врз основа на кој двете страни се обврзаа на конечен мировен договор што направи чекор кон решавање на територијалниот спор од 1980-тите.

Трамп во тоа време рече дека тоа е историски договор.