Жител на пакистанскиот град Равалпинди ја застрелал и убил својата 16-годишна ќерка откако таа одбила да го затвори својот Тикток профил, соопшти денеска полицијата.

„Таткото на девојчето го замолил да го затвори нејзиниот Тикток профил. Кога таа одбила, тој ја застрелал“, изјави портпаролот на полицијата. Наводниот напаѓач е уапсен. Според полицијата во Равалпинди, во близина на Исламабад, семејството на жртвата се обидело, без успех, „да го прикаже убиството како самоубиство“.

Насилството врз жените поради нивното јавно однесување, вклучително и на социјалните медиуми, е вообичаено во Пакистан. Властите честопати го блокираа или се закануваа дека ќе го блокираат Тикток, обвинувајќи ја платформата на социјалните медиуми за промовирање „неморално однесување“ преку сексуално експлицитна или ЛГБТК+ содржина.

Порано оваа година во Белуџистан, покраина во југозападен Пакистан каде што племенскиот закон сè уште важи во многу рурални области, еден маж призна дека го организирал убиството на својата 14-годишна ќерка поради видеа на Тикток за кои сметал дека ја „деградираат“ неговата „чест“.

Во јуни, 17-годишна пакистанска инфлуенсерка беше убиена во својот дом од маж кого таа го отфрлила. Жртвата, Сана Јусаф, имаше повеќе од еден милион следбеници на социјалните медиуми, вклучително и на Тикток, каде што објавуваше видеа од нејзините омилени кафиња или козметички производи и традиционална облека.