Енур Тотре поради технички пропуст не беше пријавен за дуелот против Естонија, но повторно е во составот на македонската А репрезентација и ќе чека шанса за настап од селекторот Игор Ангеловски за решавачкиот натпревар против Ерменија.

Потсетување в среда од 18.00 часот во Никозија ќе играме против Ерменците во битка за првото место кое води во повисокиот ранг „Лига Б“ од УЕФА Лигата на нации, а таа цел можеме да ја оствариме и со реми.

Тотре, фудбалерот на Шкендија може да помогне во средниот ред откако останавме за претстојниот меч без голем број стандардни репрезентативци, како Спировски, Николов, Барди, Елмас, Адеми, а ќе недостасуваат и Алиоски, Пандев, Димитриевски,  Ристевски, К. Велкоски.

Ангеловски ги повика дефанзивецот на Македонија ЃП, Томе Китановски и во средниот ред Дарко Мицевски (Вардар) и Душко Трајчевски (Докса, Кипар).

– Се пласиравме на ЕП, тоа го остваривме, секој натпревар е важен и го цениме. Знаеме за Ерменија за тимот, но за нас најважно е да ги спроведеме на дело задачите од стручниот штаб. Имаме многу промени, многу играчи недостасуваат, но јас верувам дека ќе го дадеме максимумот тие што сме тука. Важно е да бидеме први во оваа група, која носи пласман во Б сегментот – вели Тотре.