Тони Надал е вујко и поранешен тренер на Рафаел Надал, еден од најдобрите тенисери на сите времиња. Во интервјуто за „Ле Монд“, Тони Надал зборуваше за правилата на тенисот и начините како да се подобри самата игра и да се направи поинтересна за гледачите.

– Да го тренирам Рафа денес и тој да ме праша за тактички совет, само би му рекол да го удира топчето што е можно посилно. Веќе ја имав видено таа еволуција кога го тренирав, но од љубов кон тенисот сакав да варира што е можно повеќе, а не да биде обичен играч. Во тенисот висината на мрежата е стандардизирана, а просечната висина од 175 см се искачи на 190. Тенисерите се посилни, а поентата е што топчето оди побавно и за да се постигне тоа треба да се помали главите на рекетот. Тенисот се промени. Замислете фудбалски натпревар да започне со удар од белата точка. Тоа би било апсурдно. Изгледа така го правиме тоа во тенисот. Сервисите станаа сè потешки да се вратат – изјави Тони Надал.

Тони со Рафа работеше до 2017 година и заедно имаат освоено 16 Грен слем титули. Беше најуспешен тениски тренер сè додека тандемот Марјан Вајда-Новак Ѓоковиќ не го „симна од тронот“.

Тој зборуваше и за еволуцијата на тенисот:

– Денес во тенисот имаме два проблеми: најдобрите играчи во светот играат неспектакуларно, додека младите луѓе сè повеќе претпочитаат да се свртат кон паделот, што е полесно за учење. Општеството се промени, сакаме сè да оди полесно. Никој не троши часови удирајќи го топчето во ѕид за да ги усоврши своите удари. Правилата се сменија и во фудбалот. По ерата на „катанаџо“, кога беше забрането да се враќа топката кај голманот, играта стана понапаѓачка. Тоа е пример од кој тенисот може да научи нешто – се зборовите на Тони Надал.