Жителите на главниот град на Индија, Њу Делхи, се разбудија под зачадено небо откако квалитетот на воздухот дополнително се влоши по фестивалот Дивали. Луѓето во градот славеа со огномети и покрај забраната поради високите нивоа на загадување. Њу Делхи со недели се бори со токсичниот воздух, а владата најави ран зимски распуст за училиштата во обид да ги заштити децата.

Градот има високо загадување во текот на годината поради фактори како што се емисиите од возила и прашината, потсетува Би-Би-Си. Но, проблемот се влошува во зима бидејќи земјоделците во соседните држави палат стрништа. Ниската брзина на ветерот, исто така, ги заробува загадувачите – како оние што се произведуваат од петарди – во долниот дел на атмосферата, што го отежнува дишењето.

Во понеделник наутро, според апликацијата Самир – која обезбедува ажурирања на час врз основа на податоците од федералниот одбор за контрола на загадувањето – Индексот за квалитет на воздухот на 37 мониторинг станици во Делхи беше над 200, со неколку места кои снимиле читања од над 350.

Нивоата помеѓу 101 и 200 се сметаат за умерени, додека оние помеѓу 201 и 300 се категоризираат како опасни. Сè што е над 300 е категоризирано како „многу опасно“, а бројката повисока од 500 се смета за „тешка“. Долготрајната изложеност на високо ниво на загадување може да предизвика тешкотии со дишењето кај луѓето.

Врховниот суд на Индија ја забрани употребата на петарди за време на Дивали, дозволувајќи само некои помали огномети. Владата на Њу Делхи, исто така, забранува петарди за време на Дивали во последните неколку години, но малку кој го спроведува правилото.

Забраната за огномет разви и политички тонови, при што некои тврдат дека тоа е обид да се таргетираат хинду фестивалите. Во понеделникот, министерот за животна средина на Њу Делхи, Гопал Раи, обвини дека водачите на хинду националистичката партија Бхаратија Џаната (БЈП) – која е на власт на национално ниво, но во опозицијата во Њу Делхи – ги „поттикнувале“ луѓето да палат петарди.

„Пукањето на петарди го зголеми нивото на загаденост во главниот град. Не многу луѓе пукнаа петарди, но тоа беше направено на некои места на насочен начин“, рече тој.

Водачите на БЈП официјално не одговорија на ова. Лошиот квалитет на воздухот во понеделникот дојде откако дождовите во петокот наутро доведоа до пад на нивото на загаденост во Њу Делхи во текот на викендот.