Северноамериканската подружница на јапонската корпорација „Тојота мотор“ ќе донира милион долари за инаугурацијата на новоизбраниот претседател Доналд Трамп на 20 јануари, изјави портпаролот на компанијата, еден ден откако американските автомобилски гиганти „Форд мотор“ и „Џенерал моторс“ (ГМ) соопштија дека ќе ја донираат истата сума, пренесе „Ројтерс“.

„Форд“ и „ГМ“ ќе донираат и возила за свеченоста, додека „Тојота“ не планира да го направи тоа, соопшти јапонската компанија.

Предложените царини на Трамп за увоз од Мексико и Канада ќе влијаат на многу производители на автомобили во Северна Америка, меѓу кои и „Тојота“, која го произведува пикапот „Такома“ во Мексико. Идниот претседател има за цел да укине многу од политиките на демократскиот претседател Џо Бајден за електричните возила и емисиите на гасови.

Други големи компании, меѓу кои и „Амазон“ и „Мета“, исто така донираа за инаугурацијата.