Селекторот на македонската кошаркарска репрезентација, Александар Тодоров, и во наредната сезона ќе има клупски активности откако се договори со екипата на Крајова за продолжување на соработката.
Иако постоеше интерес од уште неколку екипи, Тодоров одлучи да остане во Крајова, романски прволигаш каде работеше и во претходните две сезони.

Претходно селекторот на кошаркарите беше тренер и на Динамо Букурешт, а има работено и во бугарските Рилски спортисти и Балка, косовскиот Пеќ и турската екипа Чукурова.

Тодоров во домашното првенство најголемиот успех го имаше со МЗТ Скопје на кого му ја донесе првата шампионска титула, а има работено уште и во Алумина, Куманово, Вардар, ФОН.