Поранешната фудбалска ѕвезда на Арсенал, Тјери Анри е убеден дека лондонскиот тим може да оди далеку, па дури и да ја освои Лигата на шампионите оваа сезона. Французинот го изрази ова мислење по победата на „топчиите“ со 7:1 над ПСВ Ајндховен на гостувањето во првиот натпревар од осминафиналето.

– Да, Арсенал може да ја освои титулата. Јас верувам во тоа и затоа го велам. Тимот покажа на што е способен, а има клучни играчи кои ќе се вратат во игра. Не сакам да покажам никакво непочитување кон Ајндховен. Мислев дека ќе биде навистина тешко, особено на гости, но Арсенал направи да изгледа лесно. Мислам дека одиграа исклучителен натпревар, а тоа можете да го видите и од резултатот – изјави Анри за Си-Би-Ес Спортс.

Арсенал е елиминиран од ФА Купот, како и од Лига купот, а шансите за освојување на Премиер лигата се илузорни. Тимот играше само во едно финале во Лигата на шампионите – во 2006 година, загуби од Барселона и оттогаш само еднаш стигна до полуфиналето на ова натпреварување.

– Сите знаеме дека Премиер лигата сега е завршена. Освен ако не се случи нешто лудо. Оваа победа може многу да му помогне на тимот да стекне самодоверба пред следниот натпревар против победникот од натпреварот помеѓу Реал Мадрид и Атлетико Мадрид – вели Анри.

На премиерлигашката табела Ливерпул е првопласиран со 67 бодови, 13 повеќе од второпласираниот Арсенал кој има меч помалку.