„Крајно некритичниот однос на Владата кон раководствата на партиите што ја поддржуваат, кога станува збор за кадровскиот потенцијал, без сомнение, широко и ја отвара вратата на партократијата, наместо на демократијата. Горан Мисовски е пратеник во Собранието, а Владата е со тенко мнозинство и евентуален конфликт со него би бил на штета на Владата“, порачува довчерашниот претседател на Новата социјалдемократска партија (НСДП), Тито Петковски, реагирајќи на разрешувањето на директорот на Јавното претпријатие за стопанисување со станбен и деловен простор, Кристијан Трајковски, кадар на оваа партија, кој раководеше со претпријатието од 2017 година.

Петковски 16 и пол години ја водеше НСДП, пред партијата на почетокот на месецов да избере ново раководство и нов претседател – Горан Мисовски, на кого Трајковски му беше противкандидат за лидерската позиција во НСДП.

Еве ја во целост реакцијата на Тито Петковски:

„На новото раководство на НСДП не му требаат непријатели, самото ќе си ја растури партијата. Првиот потез што го повлече новоизбраното раководство на НСДП на Конгресот од 4 јуни беше барањето упатено до Владата на РСМ за разрешување на Кристијан Трајковски од функцијата генерален директор на Јавното претпријатие за изградба и стопанисување со станбен и деловен простор.

Не би имало ништо чудно во тој чин, доколку не станува збор за досегашниот генерален секретар на НСДП. Гревот на Кристијан Трајковски е што се јави како противкандидат на Горан Мисовски за претседател на партијата на неодамна одржаниот конгрес на НСДП. Притоа, во предлогот упатен до Владата, не се наведува ниту една причина за негово разрешување, ниту пак некоја забелешка на неговата работа како генерален директор на јавното претпријатие или како генерален секретар на партијата. Лична суета и чист реваншизам. Па, како тоа некој да се дрзне и да му се спротивстави и да му биде конкурент за местото претседател на партијата ,на „големиот народен трибун” Горан Мисовски. За политичката култура и демократскиот капацитет на новоизбраното раководство на НСДП не сакам да говорам и тоа не е најважното во овој момент.

Самиот однос на новото раководство на партијата кон својот досегашен генерален секретар, дава јасен одговор на прашањето. Многу повеќе ме загрижува штетата што самото новоизбрано раководство и ја прави на партијата. Пораката е јасна кој ќе му се спротивстави на претседателот на партија, мора да смета на вакви последици. Иронијата да биде поголема, станува збор за врвен демократски чин, избор на претседател на партија во услови на статутарни обврски за конкуренција, односно повеќе кандидати.

Ваква штета на партијата и нема направено ниту една друга партија или друг фактор од надвор. Не е обична флоскула синтагмата, без внатрепартиска демократија, нема парламентарна демократија, ниту пак демократско општество. Иако, за ваквиот потег, новото раководство на партијата нема ниту едно рационално оправдување, уште помалку може да се оправда промтната реакција на македонската Влада.

Истиот ден,кога го добила предлогот за разрешување на Кристијан Трајковски, не губејќи време, веднаш го разрешила. Без елементарна информација за основаноста на барањето и без да го информираат дека има такво барање, по брза постапка го разрешуваат. До толку е позагадочно тоа што станува збор за човек кој со успех ја извршувал функцијата на генерален директор со образование магистер по економски науки. Мене ми е разбирлива реакцијата на Владата, но не можам да најдам рационално оправдување.

Горан Мисовски е пратеник во Собранието, а Владата е со тенко мнозинство и евентуален конфликт со него би бил на штета на Владата. При тоа, Владата на некоректен начин ги обесхрабрува младите, образовани и успешни кадри.

Конечно, крајно некритичниот однос на Владата кон раководствата на партиите што ја подржуваат, кога станува збор за кадровскиот потенцијал, без сомнение, широко и ја отвара вратата на партократијата наместо на демократијата“, пишува Тито Петковски во својата реакција.