Директорот на Австралија Опен, Крег Тили, изјави дека се уште не знае дали првиот тенисер на АТП ранг листата, Новак Ѓоковиќ ќе учествува на првиот грен слем турнир во новата сезона.

Ѓоковиќ не објавува јавно дали е вакциниран или не, а се уште и официјално не објави дали ќе настапи на грен слем турнирот во Мелбурн. Тили смета дека во изминатиот период Ѓоковиќ беше жртва на медиумска кампања.

– Малку беше непријатно кон Новак. Тој рече дека неговите медицински информации, односно дали е вакциниран или не, се приватна работа и нема намера да зборува во јавноста за тоа – изјави Тили.

Првиот човек на Австралија Опен додаде дека АТАГИ, советодавната комисија при владата на Австралија задолжена на имунизација, ветува анонимност на сите тенисери и тенисерки што ќе се пријават за медицински исклучок.