На одбележувањето 140 години од своето постоење, винарската визба „Тиквеш“ најави дека вината што се произведени од оваа година ќе треба да се запаметат, затоа што квалитетот на грозјето е таков што 2025 година ќе остане запишана во винската индустрија.

– Дење имаше високи температури, но ноќите беа посвежи од лани и така грозјето ја задржа својата свежина. Но, од оваа година, според папките се гледа дека и наредната ќе биде добра – објаснија стручњаците на „Тиквеш“, кои по повод својот јубилеј ги поканија медиумите да го посетат Лепово, во близина на Кавадарци од каде што се прави посебна серија на вино.

– Во Лепово има медитеранска клима со долги топли лета и поблаги зими. Тука постојано има ветер од Вардар и тоа прави природно проветрување на виновите насади. Тоа создава уникатен тероар – велат експертите, а домаќинот на „Домен Лепово“ вели дека би сакал поблиску до народот да го објасни зборот тероар.

– Винарските експерти сакат да употребуваат зборови што сите нема да ги разберат. Тоа е француски збор и значи земја. Но, во винската индустрија значи нешто повеќе. Тоа значи дека овде произведуваме вино каде што почвата и климата создава специфична географска одредница за крајниот производ – појаснува нашиот домаќин.

Од „Тиквеш“ се пофалија дека ги следат најсовремените светски трендови во енологијата и лозарството, како, на пример, дека дигитално и со прецизност мерат влажност и така штедат вода.

– Нашата визија за иднината е преку вложувања во обновливи извори на енергија и технологии за намалување на јаглеродниот отпечаток, воведување практики и дигитални решенија за прецизно лозарство, органско производство и заштитени географски ознаки, да бидеме двигател на промените, зелената трансформација и одржливиот развој на винската индустрија во Македонија и регионот. Под слоганот „Бескрајно твој“, продолжуваме да бидеме бескрајно посветени на нашите партнери и сите оние што уживаат во вината на „Тиквеш“ и во сите убавини на винската приказна што ја градат токму луѓето – велат од компанијата.