Американскиот производител на електрични автомобили Тесла поднесе тужба против шведската државна транспортна агенција поради доцнење со регистрацијата на нови возила за време на штрајкот, објави деловниот весник Даџенс Индустри (ДИ). Најголемиот шведски индустриски синдикат ИФ Метал се судри со Тесла поради колективниот договор за механичарите, кои штрајкуваа на 27 октомври и повеќе не ги сервисираат автомобилите на Тесла.

Во знак на солидарност со нив се приклучија и членови на други синдикати, вклучително и поштенски и пристанишни работници и чистачи, што предизвика прекин на дистрибуцијата на регистарски таблички за возилата на Тесла. Минатиот петок, 50 работници на шведскиот снабдувач со клучни делови Хидро Ексторшонс, подружница на норвешкиот производител на енергија и алуминиум Хидра, се приклучија на штрајкот.

„Тие доставуваат делови за фабриката Тесла во Берлин и ако тоа им го наруши бизнисот, се надеваме дека ќе ги принудиме да се вратат на преговарачка маса“, рече во петокот секретарот за преговори на ИФ Метал, Вели-Пекка Саикала.

Хидро Ексторшонс во Ветланда, Шведска произведува алуминиумски профили и е единствениот снабдувач на овие делови во Европа, нагласи Саикала. Тоа е, исто така, првиот снабдувач на Тесла во Европа кој се приклучи на штрајкот на механичарите.