По извонредниот успех постигнат минатата година во главниот град на Романија, со две изложби на слики во познатата галерија „Константин Бранкуши“, во рамките на зградата на Романскиот парламент, и во галеријата на Националниот музеј на романската литература, како и со учеството на 13-тиот Интернационален фестивал на поезијата, нашиот реномиран мултимедијален уметник со светско реноме Киро Урдин повторно ќе се претстави пред романските љубители на уметноста.

Овојпат, на покана на Музејот на романскиот селанец во Букурешт (музеј кој во 2006 година е прогласен за најдобар музеј во Европа), ќе биде реализирана изложба на фотографии со тематски наслов „Луѓето од долината Омо“.

Фотографиите кои ќе бидат претставени на изложбата Киро Урдин ги направил за време на неговите бројни патувања во Африка во текот на снимањата на неколку негови документарни филмови.

„Tука се припадниците на племињата Мурси, Боди, Квего, Мугон, Ари, Бана, Хамар, Аробе, Каро, Сурма, Диме, Консо… кои опстојуваат и живеат во долината Омо. Да се видат и доживеат тие прекрасни припадници на овие етнички групи е вистински топол шок за секое срце. Кај некои од нив кожата им е изгравирана, кај други е насликана со бои, а богатата разновидност на пропратни украси помага да се збогати уште повеќе нивната убавина. Природно спонтани луѓе, како срцето да им минало во нивните насмевки…“, напиша Киро Урдин во еден негов текст насловен „Омо Валеј“.

Куратор на изложбата е Теа Теохаревска – Иванова, дипломиран филолог по романски јазик и книжевност, а комесар е Јане Теохаревски, историчар на уметност. Изложбата ќе биде отворена на 18 јули и ќе трае до 18 август, а е во организација на Амбасадата на Република Северна Македонија во Романија.