Телохранител на американскиот државен секретар Марко Рубио бил уапсен откако се степал со полицајци во Брисел, пренесе „Индепендент“.

Агентот на Дипломатската служба за безбедност (ДСС) бил врзан со лисици и приведен минатиот понеделник, откако се разбеснил зашто персоналот во хотелот „Амиго“ одбил да го отвори барот по работното време, објави Вашингтон Егзаминер.

Телохранителот потоа станал физички агресивен кога персоналот, вклучително и ноќниот менаџер на хотелот, се обиделе да го убедат да се врати во својата соба, изјавиле извори за „Вашингтон пост“.

Кога била повикана полиција, агентот на ДСС се обидел физички да се пресмета со полицајците, по што бил уапсен.

Обезбедувачот бил ослободен подоцна ноќта, по интервенција на Американската амбасада во Брисел.

Рубио минатата недела престојуваше во хотелот кога ја посети Белгија за конференција на лидерите на НАТО, но тој не бил таму во моментот на инцидентот.